I organs dl’Euregio

Le Consëi dla Provinzia Autonoma de Balsan, Le Consëi dla Provinzia Autonoma de Trënt y le Consëi dl Land Tirol á bele tl 1998 fat fora da renforzé la cooperaziun interregionala danter chisc teritori tl cheder de na Euroregiun. Tl 2009 ân spo fat n vare implü devers dl dagní. La sentada dles trëi assembles legislatives adöm â damané i governs provinziai da ti dé al’Euregio na forma iuridica nöia meton jö la strotöra istituzionala che ess caraterisé le GECT “Euregio Tirol-Südtirol-Trentin”.   

La strotöra dl’Euregio é dada dant dai Ac costitutifs (Convenziun y Statut). Chisc ac é gnüs sotscric dai trëi Presidënc ai 14 de jügn 2021 tl Ciastel Thun (Trentin). Les bases dl’Euregio vëgn tratades te n ciamp a pert tl sit web dl’Euregio.
Le Statut dá dant la manira da lauré y les competënzes di organs, y implü sciöch’al vëgn tut les dezijiuns. I organs dl’Euregio é:

• l’Assemblea
• la Junta
• le Presidënt/ la Presidënta
• le Secreter General/ la Secreteria Generala
• le Colegium di revisurs di cunc

L’Assemblea é metüda adöm dal medemo numer di rapresentanc dles assembles legislatives y dles Juntes. Tl esecutif él i Presidënc y n ater rapresentant dles Juntes. Tl organ legislatif él i presidënc di Consëis provinziai y n ater rapresentant di Consëis provinziai.

La manira sciöche l'Assemblea é metüda adöm respidlëia da öna na pert l’avalianza danter l'esecutif y le legislatif, y dal'atra pert éra l’espresciun dl’avalianza danter i trëi teritori. L'Assemblea á trëi funziuns prinzipales: ara ti dá dant al GECT les diretives por ch’al ti vais do a sü obietifs, ara controlëia che i obietifs sides gnüs arjunc y aprovëia le bilanz.  

La Junta é metüda adöm dai trëi Presidënc. Ara deliberëia le program y dötes les ativités dl’Euregio. Implü se dá la Junta jö cun dötes chës chestiuns, che ne vëgn nia tratades dai atri organs y ara tol dötes les dezijiuns che é debojëgn por che le GECT pois lauré bun.

Un di trëi Presidënc dles Provinzies é le Presidënt dl GECT. L’inciaria vëgn baratada jö dales trëi Provinzies vigni dui agn, por ti dé le medemo pëis ai mëmbri. Le Presidënt é le rapresentant legal dl GECT y á chisc compic:

• al chërda ite y mëna la Junta, y mët jö l’ordin dl de;
• al ti porta dant al’Assemblea le bilanz economich preventif de un n ann y de deplü agn y les ativités dla Junta;
• al ti porta dant ala Junta le program de laur anual.

La Junta y le Presidënt se joa de n secreter general da mëte a jí les ativités. Vigni Provinzia ti mët a desposiziun n rapresentant al secretariat general dl’Euregio, cun sënta a Balsan. Le funzionar o la funzionara dla Provinzia mëmbra inciariada cun la presidënza, tol sö ince les funziuns dl Secreter general o dla Secreteria generala. Les ativités dl GECT vëgn coordinades dal Secreter general, assistí dai rapresentanc dles atres döes Provinzies. Al tol dötes les dezijiuns do avëi consulté le directorium dl secretariat general. Le Secreter general o la Secretaria generala á, danter l’ater, chisc compic:

• al arjigna ca les sentades dla Junta y dl’Assemblea;
• al dëida le Presidënt te sües funziuns;
• al ciara che les deliberaziuns dla Junta vëgnes portades a fin cun la colaboraziun dles strotöres  aministratives di mëmbri.

Le secretariat general vëgn daidé da n secreter e da d’atri colaboradus che dëida i responsabli da realisé i proiec dl’Euregio. N Colegium di revisurs di cunc controlëia la gestiun finanziara y economica dl GECT y la porta dant.

En gaujiun dl’EuregioLab2020 él gnü lauré fora na reforma dla Convenziun y dl Statut. Le fin ê chël da trá ite ciamó deplü la popolaziun, i comuns y i parlamënc litá. La sotscriziun di Statuc nüs, che gnará a s’al dé en gaujiun dl De de Tirol 2021 a Alpbach, portará tröpes mudaziuns tla strotöra istituzionala dl’Euregio. Tl 2021 garál daurí ince a Desproch y Trënt ofizi de coordinamënt  Euregio, por che l'Euregio sides ciamó plü presënta ti trëi teritori. Cun la reforma dl Statut dess l’istituziun Europaregiun, che festejëia tl 2021 so diejim aniversar, ester ciamó plü arjignada ales desfides y inovaziuns di diesc agn che vëgn.