Le Festival dla jonëza dl'Euregio a San Martin de Tor é gnü stlüt jö

Cun na discusciun sön le dagní dl'Euregio Tirol-Südtirol-Trentino y l'incuntada cun l'assessur por la formaziun y cultura ladina tl Istitut Cultural Ladin “Micurá de Rü” a San Martin de Tor é le Festival dla jonëza dl'Euregio 2023 rové incö (ai 7 d'otober) a so ultim de. Tratan l'incuntada por stlüje jö chisc dis cun l'assessur ti á les jones y i jogn cunté de sües impresciuns, á definí la manifestaziun dër interessanta y na bona ocajiun por fá amizizies che vá sura i confins fora y superé barieres linguistiches. Le Festival dla jonëza dl'Euregio 2023 á metü man en mercui, ai 4 d'otober tl Istitut Ladin "Micurá de Rü" a San Martin de Tor cun na presentaziun de süa ativité da pert dl diretur Jürgen Runggaldier.

Tl zënter le plurilinguism, la cultura y le turism

I temesc zentrai dla dodejima ediziun dl festival da en chësc ann é stá le plurilinguism, la cultura y le turism. 36 partezipanc y partezipantes danter 16 y 19 agn dales trëi regiuns dl'Euregio á podü te chisc cater dis de festival tla Val Badia se fá n'idea sön le lingaz ladin, la cultura y la storia dla jënt ladina. N dër highlight por i jogn y les jones é sté le curs intensif de ladin. Sön le program êl ince workshops cun artisć y artistes tl Museum Ladin "Ciastel de Tor" che i jogn y les jones á podü vijité cun la direturia Katharina Moling, che i á condüt fora por le museum. Implü ái podü se dé jö cun la storia dla Ladinia, dantadöt cun i cënt agn dala spartiziun, che Dennis Dorigo, le diretur dl Istitut Cultural Ladin "Cesa de Jan", ti á porté dant.

Vijites a museums y incuntades cun jënt fora dl monn dl sport

Tratan i cater dis de festival á la jonëza ince albü l'ocajiun da jí a ti ciaré al Museum dla Gran Vera "Tre Sassi" sön Valparola y al Museum alaleria sön piza de Lagació. Al n'é nia ma gnü tematisé le lingaz y la cultura mo sambëgn ince le turism: sot al moto "Evënc sportifs y turism tl'Alta Badia" s'á i jogn y les jones incunté cun porsones importantes fora dl monn dl sport y dl turism, y á ince albü l'ocajiun da podëi dé n'odlada iadô les culisses de n hotel a La Ila.

Festival dl'Euregio zënzater dër garaté

Bele da oramai dodesc agn condüj adöm le Festival dl'Euregio jënt jona danter 16 y 19 agn dal Tirol, Südtirol y Trentino sot al moto "Costruí deboriada la regiun europeica". Dl 2014 é le festival dla Jonëza dl'Euregio gnü premié dal'Uniun Europeica cun le secundo post tl cheder dla pröma indiziun dl pest dl EVTZ "Building Europe Across Borders".

ASP