Tl segondo ann dla presidënza de Südtirol meterà l’Euregio Tirol-Südtirol-Trentin n droa de ndut 61 pruiec y scumenciadives sëura i cunfins ora. Chësta ie la previjion dl program de lëur nchin che la presidënza ti unirà sëurandata al Bundesland Tirol ai 1. de utober dl 2025. L program ie unì dat pro n juebia ai 26 de setëmber dai organns plu auc, plu avisa dal diretif y dala aduneda tla Biblioteca Zivica de Persenon.
Ala fin à l presidënt dl’Euregio, l presidënt dla Jonta provinziela de Bulsan Arno Kompatscher, deberieda cun i sëurastanc dl Tirol Anton Mattle y dl Trentin Maurizio Fugatti, prejentà publicamënter l program.
Dlongia mesures de plu ani dëssel nce unì pità ufiertes nueves. “L’Euregio uel cialé che te duc i ciamps dla vita pòssel sauté ora n plusvalor per la jënt,” da coche à sotrissà l presidënt dl’Euregio Kompatscher. N gran pëis uelun ti dé ala mubltà daujin dla jënt: “Son tl lëur de lauré pra n Ticket-Euregio, per ti dé nscila na sburdla acioche la jënt se mueve te dut l raion dl’Euregio cun i mesuns de trasport publich, a n priesc che n ebe l muet de cumpré chësta cherta y per na bela esperienza te chësc nosc raion.”
L ie pona nce unì prejentà I resultac dl EuregioLab, che se ova dat ju d’agost cun l manejamënt y anuzamënt dla nteligënza artefiziela tl’aministrazions publiches. L sëurastant dl Tirol Mattle dij n chësc cont che “l’Euregio uel vester danora, al’avanverdia, tl anuzamënt y manejamënt dla nteligënza artefiziela, cunscidran sambën nce i aspec etnics y iuridics.” Chësc documënt de teses ti vën śën seurandat ala y ai assessëures provinziei cumpetëntes/c. N uel dantaldut ejaminé coche la NA posse utimisé i servijes dl EuregioFamilyPass.
Per l cunliamënt storich di raions dl’Euregio iel l pruiet „Atlas Storich Digitel“, da coche à dit l sëurastant dl Trentin Fugatti: “L’Euregio uel che l plu jënt che l ie mesun posse ti jì permez ala storia deberieda, trajan adum y miuran dal pont de ududa logistich y urganisatif i pruiec bele danman tla divulgazion dla storia.” Propi perchël dëssa tl daunì na plataforma online mustré su y cunté la ntraunides storiches plu mpurtantes te na maniera saurida da ntënder da dutes y da duc.
N ann de gran mpurtanza sarà l Ann di Museums 2025. Cun referimënt ala vieres di paures de dan 500 ani iel al mumënt 35 museums dla Euregio che fej pea cun pruiec per se cunfrunté cun i tëmps de crisa y cun i mudamënc tl passà, tl prejënt y tl daunì. N di dal sport iel ai 5 de utober a Bulsan: pra l EuregioSprintChampion saràl da udëi la garejedes cun i y la sprinter jëuni/es plu da talënt de dui trëi i raions dl Tirol storich.
gst/dl