Persunalisé na plata de n calënder cun na fotografia che n à fat nstësc: n’upurtunità che l ti vën nce chëst ann dat ai zitadins dl’Euregio Tirol-Südtirol-Trentin. Dl’aurela iel nchin a n dumënia ai 4 de agost dl 2024 per ciarië su la pultredes sun la plata internet dl'Euregio per fé che la iuria n chiere ora una o doves. La fotografies de chiche vënc unirà publichedes sun l calënder dl’Euregio 2025.
L ne n’ie degun lims al’esprescion artistica y a ciuna tematiches che l vën cris ora: mpurtant iel che la fotografia sibe unida fata te un di trëi raions cumëmbri dl’Euregio y che la reprejënte te na maniera criativa si varietà.
L presidënt dl'Euregio y dla Provinzia de Bulsan Arno Kompatscher nvieia chiche fej pea a jì sëura la sëides ora canche i va a crì chël che i uel pultré ju: ”Ti on crëta che l venie ora na pruspetiva nueva, che vede sëura i cunfins de nosta mënt ora y sibe bona, tres l ubietif, de abiné aspec mo nia unic ora dl’Euregio.” Truepa pultredes sarà bones de pië la natura y cuntredes de marueia, jënt o elemënc de cultura, architetura y tradizions, o mumënc reres y ntraudides deberieda dl’Euregio. Kompatscher y i presidënc dl Trentin, Maurizio Fugatti, y dl Tirol, Anton Mattle, ie a una che l se mpaie a reprejenté uni tematica tl calënder y se dij cuntënc che la publicazion sibe for plu y plu cunesciuda y populera: permez al’edizion dl 2024 à l’Euregio defati auzà la cumpëida de calëndri de 6.000, jan nscila da 13.000 su a 16.000 per l calënder da taché sun mur y da 8.000 su a 11.000 per chël da mëisa.
Duc chiche ie dl Tirol, Südtirol y Trentin possa fé pea pra l cuncors y prejenté nchin a 4 fotografies per uni sajon, chël uel dì al plu 16 pultredes. L’Euregio se damanda che la fotografies vënie ciariedes su tla ressoluzion mascima y che i files vënie tlamei cun nfurmazions dl subiet reprejentà y dla persona che à mandà.
Dut adum uniràl cris ora 49 fotografies; una per la cuverta dl calënder y dodesc per l cheder prinzipel de uni mëns, ora che mo trëi sëuraprò per l compost de uni mëns. Duta la fotografes y i fotografs unirà ala fin dla finedes refigurei deberieda sun una na medema plata dl calënder.
Uniuna y uniun che sibe bon/a de mpresciuné la iuria cun na pultreda ne possa nia mé speré che si foto vënie publicheda, ma nce de vëncer na joca mpermeabla cun la grafica dl’Euregio.
La furmazions n con’ dl cuncors ie danman per unì cunsultedes tla plata internet dl’Euregio: www.europaregion.info/lad/concors-fotografich
LPA/dl